La Pimpa la va a Milan

de la Simona Scuri de Far Lombard, associazion per la lengua lombarda

In principi de agost 2020 a g’è vegnud pront una storia de la Pimpa tuta in lengua lombarda : La Pimpa la va a Milan, edizion Franco Cosimo Panini, in collaborazion cont Far Lombard. La traduzion in lombard a l’è a cura del Lissander Brasca.

El liber al g’ha el patrocini de la Citaa Metropolitana de Milan, de la Rejon Lombardia e dei Pro-Loco de la Lombardia. A l’è publegad cont el sostegn de l’Impresa Milesi de Monça (MB) e de la societaa Italkrane de Busser (MI).

La Pimpa la va a Milan 1 Nord Notizie

A l’è un liber per fiœi a partir dei 4 ann ma, naturalment, ge vœl la mamagranda, el papagrand o i jenitor per lejer-l  insema ! La Pimpa la va in jir per Milan e la descovriss i cantonin plussee simpateg de la citaa, i personaj de la citaa e una quai riceta de robe bone de mangiar.

La Pimpa la va a Milan a l’è dissegnada de l’Altan e a l’è dedegada ai jir turisteg del nominad cagnœl bianc à pois ross, la Pimpa. La gollana denter la qual a g’è adess anca La Pimpa la va a Milan la se ciama ‘Citaa in jœg’. Ogni liber de la gollana a l’è dedegad a una citaa qe la Pimpa la visita : Mantova, Turin, Jenova, Trent, Verona, Ravena e oltre anc’mò, insema ai so amix de semper, l’Armand, el Colombin, el Bomba, la Dolores. I ‘Citaa in jœg’ inn disponibel anca in ingles e in frances. A g’è anca una bella version in lengua veneta del jiret de la Pimpa a Venezia. El titol a l’è, naturalment, Ła Pimpa ła va a Venesia, voltada e publegada a cura de l’Academia de ła Bona Creansa, semper in collaborazion cont la Franco Cosimo Panini.

La Pimpa, viscola e curiosa, la va in jir per Milan e la fa cognosser i aspets storeg, artisteg e culturai grazia a i bei illustrazion e jœg divertents de far denter e fœra del liber, cont dei adesiv e indovinei de resolver… e la parla a’l 100% lombard !

Una curiositaa : l’autor, el Francesco Tullio-Altan, a l’è nassud a Trevis ind el 1942, l’ha studiad a Bologna e a l’universitaa de arqitetura de Venezia. L’ha lavorad a Roma ind l’ambit dei scenografie per el cinema e la television e i so prim dissegn inn staits publegads de un mensil domà per omen : Playmen. Despœ de un period passad in Brasil l’ha vivud intra Milan e Aquileia e in sul jornal ‘Linus’ l’è comparsa, per la prima vœlta, ‘La Pimpa’ : a l’era el 1975. Anca luu, donca, a l’è stait un bell poo in jir tant ‘mè la Pimpa !

L’Altan l’ha lavorad per tants editor. Intra el 1982 e el 1983, sota la direzion del bressan Osvaldo Cavandoli, autor del famos personaj ‘La Linea’, l’ha realizad anca 26 filmads de animazion de la Pimpa qe hann fait el jir del mond. I storie de la Pimpa inn staite voltade in paregie lengue e a l’è stra-famosa. E adess la Pimpa la g’è finalment anca in lombard : La Pimpa la va a Milan, disponibel online e in libreria !

Inn dei liber de collezionar, faits per jugar, lejer e imprender e, naturalment, publegads per

sostegnir i nostre lengue rejonai. El prezi de covertina a l’è 7,50 euro e la spedizion la riva ind un quai dì. Và qe bell regalin ! Bon spass !

https://www.francopaniniragazzi.it/index.php/pimpa/citta-in-gioco/pimpa-va-a-milan-milanese.html

Gianantonio Bevilacqua
Gianantonio Bevilacqua 238 altri articoli
Gianantonio Bevilacqua, giornalista pubblicista dal 1998 Ordine dei Giornalisti - Regione Lombardia. , Esperto di difesa e politica

Scrivi il primo commento

Rispondi, replica o rettifica