Una bevanda fresca per l’istad

Del Matee Tignonsin, Associazion Far Lombard

Quand qe se parla de istad, vuna de le prime parolle qe ven in ment l’è “idratazion” : dree a qella stajon qé, la salud la se manten cond un just aport de aqua, sai minerai e vitamine. De spess però se sent miga el sens de la sed, o se ge pensa miga trop a bever; l’è mei allora adotar una quai stratejia per bever de plu, e aumentar i sai minerai e le vitamine qe ciapom. Per esempe se pœl preparar, de manera facil e svelta, de le bevande belle fresqe e gustose, qe le fa vegner voia de bever-le :

  1. Aqua e menta : l’è la bevanda plu facil de far, l’è bona e la g’ha tante proprietaa positive. Inveci de far-la cond i scirop e i preparads, qe i è pien de zuqer e de colorants, se pœl crompar una piantina de menta e butar-g denter una quai foia ind l’aqua freida, magare un poo sqiçada o maxnada, e cond un quai toqellin de giaç. Se al piax, se pœl jontar-g anca un poo de jux de limon, e se l’è biolojeg anca un poo de scorza gratada !
  2. Tisana freida : v’è-la vanzada de l’invern una tisana qe la ve piaxeva, ma adess al fa trop cald per bever-la ? L’è assee preparar-la la sera, meter-la ind una boça de veder o ind una boticia de metall, e far-la freidar la noit ind el frigor. La matina qe ven, g’havrii una bona bevanda freida, piena de sai minerai, de tœr su per indar a’l lavorar, ind spiaja, a’l parc!
  3. Centrifuge, estrats e jux : i è qei qe i g’ha plu tante vitamine e sai minerai, e i va semper ben, a tute le ore e per tuta la famea. Un per de consili però : l’è semper mei mes’ciar la fruta cond la verdura, perqè insé la quantitaa de zuqer l’è miga insé alta. Per esempe : pom, seller e carotola l’è una bella combinazion ! De regordar-s po qe le vitamine le se rovina cond el passar del temp. In qell cas qé, l’è semper mei bever-le apena faite, senza speitar trop tant !

Sarà-la quala donca la bevanda de la to istad ? L’aqua cond la menta fresca del to pojœl ? Una bella tisana freida, de tœr su e bever dree a’l dé ? O una centrifuga de bever cond tuta la famea ?

Redazione
La Redazione

Scrivi il primo commento

Rispondi, replica o rettifica