Dificoltaa finanziaria ? Ge pensa el MES ?

De l’Albert Jussan, Associazion Far Lombard

Se parla tant del MES, ma videm un poo cossa l’è.El “MES” a l’è l’acronim de Mecanism Europee de Stabilitaa e l’è un’instituzion finanziaria internazionala creada dei Paes de l’Union Europea, i quai inn anca member de la moneda Euro.La soa sed a l’è in Lussemburg e al g’ha 155 dipendents qe vegn de 35 Paes, intra i quai Stats Unids, Cina e Brasil.El proposit del MES a l’è quell de vutar-g ai paes member in dificoltaa finanziaria greva. Al sostituiss l’EFSF, un’instituzion temporania fondada ind el 2010.El so fonzionament a l’è quell de proveder a dar prestits de emerjenza, ma in compens, i paes i g’hann de far dei programa de reforma in sui cunts de finanza publega. Insema a quell de prima – l’Instrument europee de stabilitaa finanziaria (EFSF l’è el so acronim in ingles) – el MES al pœ prestar un total de €700 miliards.El MES a l’è vuna dei plussee grande instituzion finanziarie internazionai del mond e al g’ha un capital versad de plussee de 80 miliards de euro.

Insema a l’EFSF, el MES l’ha erogad 250 miliards de euro de prestits in quella de la tampesta finanziaria qe g’è stait un quai ann indree. Qell import qì a l’è plussee qe tre vœlte de quell qe l’FMI l’ha erogad a nivell mondial ind l’istess period. El MES l’è vuna dei instituzion qe emeten plussee debet denominad in euro ind el mond.In quella de la crisi dei debets sovran in Europa, çoè quella dei debets publeg dei paes qe forma la zona euro, el MES e l’EFSF hann contribuid a tegnir insema la moneda. I hann prestad daner a Grecia, Irlanda, Portogall, Spagna e Ciper.

Senza de qell aiud lì, un quaivun de qei paes qì l’havariss dovud andar fœra de l’euro.Ind i programa de assistenza de l’ESM o de l’EFSF se spend gnanca un sold dei contribuents. Tute do i instituzion i otegnen i so fonds in sui mercads finanziari. Vist qe i enn finanziariament sostegnuds dei Paes de la zona de la moneda comuna europea, i pœden ciapar in prestit daner a tass favorevol. Pœ qei daner lì i vegnen transferids ai Paes member qe g’ha besogn de aiud a travers del programa.Adess l’EFSF al pœ plu dar fœra prestits cont dei programa nœv de assistenza, ma al va inanz a vesser ativ in sul mercad obligazionari per jestir el so debet.

Redazione
About Redazione 110 Articles
La Redazione

Be the first to comment

Rispondi, replica o rettifica