La Szczerbiec, la spada de Polonia

Del Gianluca Zanchi, Associazion Far Lombard

La Szczerbiec l’è l’antiga spada cerimonial dovrada ind la plu part dei incoronazion dei Re de Polonia, e l’è probabilment ol plu important dei so simboi nazionai. Ol significad del nom l’è “Spada Sqeiada”.

Segond la lejenda, la saress staita dovrada del prim sovran, Boleslav I ol Corajos, per bœtar jo la Porta d’Or de Kiev ind el 1018; jœst in qesta ocasion la se saress sqeiada. Inscambe, segond i studios la saress staita fabregada adoma ind el XIII secol, in Renania. Ol so prim proprietare l’è stait un olter Boleslav (Boleslav I de Masovia diit ‘ol Devot’) e l’era dovrada come Gladius Iustitiæ (simbol del poder judiziare del re). Ol nom al vegneress de la crena ind la lama, creada, pœl dar-s, per portar dei reliquie.

Del XIV secol l’ha començad a vesser dovrada per incoronar i sovran ind la Catedral del Wawel, a Cracovia. Ind el 1764 l’è staita dovrada per l’ultem sovran, Stanislav II, inants de la spartizion de la Polonia intra Russia, Austria e Prussia. Despò de la revolta de Cracovia del 1794, ol Castell del Wawel l’è stait saqejad dei trupe prussiane e la spada portada vià. Dop vesser passada de man plu volte, ind el 1928 l’Union Sovietega l’ l’ha daita indree a’l nœv stat polac, renassid ind el 1918.

Quand qe la Jermania nazista l’ha tacad la Polonia, la Szczerbiec e i tesor nazionai i è staits subet evacuads in Romania, per po partir via mar per la França. Ind el mez del viaj, la Luftwaffe l’ha bombardad ol convoi e la spada l’è staita ligada in mez a do asse de legn, cond un messaj ind una botilia. Insé, anc se la nav la fœss indaita a fond con tœts i olter tesor polac, almanc la spada la se saress salvada.

Dop qe l’è staita in França e Ingilterra, l’è tornada in Polonia ind el 1959. Incœ s’pœl amirar-la ind el Musee del Castell del Wawel.

#Lombard Language UNESCO ISO 639-3 lmo

Gianantonio Bevilacqua
Gianantonio Bevilacqua 238 altri articoli
Gianantonio Bevilacqua, giornalista pubblicista dal 1998 Ordine dei Giornalisti - Regione Lombardia. , Esperto di difesa e politica

Scrivi il primo commento

Rispondi, replica o rettifica