di Simona Scuri de l’associazion Far Lombard
Ven-To a l’è un projet, un’idea, una proposta facilment realizabil.
Cont un studi del DAStU, Departiment de Arqitetura e Studi Urban del Politecneg de Milan, i 679 Km de la dorsal cicloturistega inn stait studiads ind i detali.
679 km de percors qe al podaria collegar Venezia a Turin (comè qe al dix el nom Ven-To).
679 km de pista ciclabil, la plussee longa d’Italia, per i amants de la natura, del moviment san, de la cultura, del paesaj, dei borg, dei citaa storege e de la bona cuxina.
679 km in grand part adree a’l fium Po, istess de tante piste ciclabil d’Europa. Un quai esempi : adree a’l Danubi, 2860 Km de pista ciclabil, adree a’l fium Loira, a’l fium Inn, a’l fium Drava o in sul lag de Costanza.
In Olanda, Jermania e França el cicloturism al g’ha un grand sucess; a l’è facil veder in jir dei familie a’l complet e ben organizade per i ferie in su do rœde.
La Lombardia la g’ha 4.000 km de piste cont 100 itinerari, la red plussee granda d’Italia. La VenTo a l’è anca un ‘motor ecologeg’ e ‘verd’ perqè, semper segond el studi del Politecneg de Milan, la portarà incirca 2.000 posts de lavorar nœv e un util de 100 million de euro a l’ann.
Ind el 2016 g’è stait firmad un acord qe l’impegna quater rejon (Piemont, Lombardia, Emilia, Venet), el Minister per i Trasports e i Infrastruture, el Minister ai Ben e ai Ativitaa Culturai e del Turism per coordinar i sistemazion necessarie per la missa in segureza, i collegaments dei toc de pista jamò esistents, i cartei cicloturisteg, l’ospitalitaa e insì via.
La ciclovia la tocarà plussee de 1.300 ben culturai e plussee de 40 aree verd protejude de la Bassa Padana qe, ve fem a ment, l’è vuna dei aree europee plussee numinade per tradizion gastronomega. Donca, bona pedalada e… bona degustazion !
www.progetto.vento.polimi.it – Font : Flyer DAStU, Fevrer 2018. #Lombard Language UNESCO ISO 639-3lmo
Rispondi, replica o rettifica