Un passpartout per i sits culturai lombards

De la Simona Scuri, Associazion Far Lombard

La cultura, i musee, i parc arqeolojeg, i ville, i castei, i ortaie botanege e insì via dovarien vesser patrimoni fruibil gratuitament per tuts. In Lombardia un pass inanz a l’è stait fait. Cont Maj 2015 i amants de la nostra rejon pœden comprar una tessera qe la permet de visitar plussee de 150 sits de interess storeg e artisteg in tute i so 11 citaa e province (e adess anca Valle d’Aosta).

La tessera la costa 45 euro (un poo men per jovin, senior o per olter abonament) e la dà dirit a visitar – gratuitament e ogni vœlta qe vun al vœl – musee, ville, jardin, torr qe normalment inn a pagament. La includ anca musee privads o miga statai. La dura 365 dì de quand qe vun la compra e a l’è stra-comoda.

De soraplu la dà dirit a dei scunts importants in su spetacoi teatrai, concerts, esposizion d’art e insì via. Ind el 2017 a g’è stait un increment de visite cont la tessera del +73,8% respeit al 2016 (info T.C.I). Qei numer qì ne dixen comè qe el desideri de cognosser la cultura e i belleze de la nostra rejon a l’è dree a cresser.

La lista dei sits a entrada libera a l’è in su la red a l’indiriz abbonamentomusei.it. Qì g’è un quai esempi dei sits qe se pœ visitar cont la carta: l’Accademia Carrara de Bergem cont i so 600 quader, ben 34 musee de Milan, el parc arqeolojeg de la Vall Camonega patrimoni UNESCO, la Villa Carlotta e i so jardin a Com, el musee del violin a Cremona, el Teater Scientifeg de Bibiena a Mantova, el parc de art contemporanea Rossini Art Site, el musee de la scarpa a Vijevan, el musee Valtellines de storia e art, l’Isolin Virjinia in sul lag de Vares…

La tessera a l’è el fruit de la collaborazion intra Rejon Lombardia e olter realtaa partecipants. Per quei qe ge n’ha miga assee, g’è anca la possibilitaa de combinar la tessera lombarda cont una tessera compagna qe la val ind la Rejon Piemont.
“#Lombard Language UNESCO ISO 639-3lmo” Publegad el 26 de Oitover 2018 in ValtellinaNews

Redazione
La Redazione

Scrivi il primo commento

Rispondi, replica o rettifica