El cine in lengua lombarda

de la Simona Scuri, Associazion Far Lombard

G’è vegnud fœra el quart dopiaj cinematografeg in lengua lombarda a cura del TEPSI, el Teater Popolar del Texin. El titol orijinal todesc del film a l’è ‘Die schwarzen Brueder’ ma a l’è diventad ‘I spazacamin’ ind l’edizion lombarda. La sotascrita l’ha prestad la soa vox per la protagonista feminil.

Ind el 2010, a Monça, a g’è jemò staita la projezion de ‘Se ta cati ta copi’, version in lengua lombarda del film western ‘The searchers’ (Sentieri selvaggi), cont el John Wayne.

El film, voltad integralment in lombard, l’emoziona fin del prim dialog e al colpiss per la qualitaa professionala dei vox dei ator e de la nœva rejistrazion.

L’istess valor al se trœv anca ind i olter films dopiads in lombard sota la direzion e produzion de l’ator e rejista professionista Yor Milano, tradutor, produtor e anema dei iniziative del TEPSI : ‘Scapa ti che scapi anca mi’ (La Grande Vadrouille-Tre uomini in fuga) cont el Louis de Funès e ‘Duu testimoni scomod’ (Some Like it Hot) qe a l’è el famos

‘A qualcuno piace caldo’, cont la Marilyn Monroe, el Tony Curtis e el Jack Lemmon, qe se pœ tastar ind un bellissem trailer del film in sul Youtube.

I version lombarde de quei films qì podarien verossimelment  incontrar un otem sucess, se fudessen trasmetude a la television o presentade ind una quai rassegna in sul cinema in lengua lombarda.

Insema ai long-metraj anca i curt-metraj se fann strada e representen una fioridura interessanta del cinema in lengua rejonal, un quaivun pœdom citar-l : ‘Panasce’ del Stendhal Syndrome (Texin), ‘L’Elvira’ de la Ornella Fiorini (MN), ‘Il mattino sorge a Est’ del Stefano Tagliaferri (LC), ‘La Pimpa: na giurnada fòra du solit’ de l’Altan/Smallcodes (Texin); ma anca ‘Ona strada bagnada’ e  ‘Desmentegass’ del Lamberto Caimi (MI), ‘El prét nöf’ e el ‘Matrioskar’ de l’Ettore Bonetti (BS). Anca i plussee ironeg Frontaliers o per finir, semper curade del Yor Milano/TEPSI, i trasposizion dei œvre teatrai ‘A duu pass da l’eternità’, ‘Na bela tosa par tri dotor’, ‘Do tosan e tré valiis’. 

El cine in lengua lombarda a l’è viscor ! Sperem de veder-l prest ind una quai bella rassegna, magara itineranta, in jir per tute i citaa de la Lombardia.