
di Simona Scuri, Presidente Associazione Far Lombard
La lingua Lombarda è censita dall’UNESCO (codice ISO 639-3 lmo) tra le lingue in pericolo d’estinzione, è menzionata in vari trattati storici e moderni, ha una storia scritta che risale almeno al XIII secolo, ed è ancora usata, nelle sue varianti locali, da qualche milione di lombardi. Simona Scuri, Presidente della Associazione “Far Lombard” lo spiega “in lingua”
Tuts a l’sann qe ind el mond se parla un monton de lengue diverse. Ma a g’è anca dei lengue qe inn parlade semper plussee poc. In Italia inn trentado i lengue in pericol d’estinzion segond l’Unesco qe l’è l’organ dei Nazion Unide qe se ocupa de scienza, cultura e educazion. Cont l’aiud de lenguista de tut el mond, l’Unesco l’ha publegad un atlas dei lengue qe inn dree a descomparir in sui vari territori del mond, el famos ‘Atlas of the World’s Languages in Danger’.
Comè se sa, l’Unesco al se ocupa minga domà de ben tanjibel, çoè de castei, giexe, palaz, bosc o moniments. L’Unesco l’invida i governa a protejer e a salvaguardar anca i cognossenze, la cultura e i lengue dei divers teritori, qe inn ben intanjibel, patrimoni de l’umanitaa.
Intra i tante lengue in pericol d’estinzion segond l’Unesco a g’è el lombard, el sicilian, el piemontes, el ligur e inscì via. La lengua lombarda (cont tute i so varietaa locai, ciamade anca dialets) a l’è catalogada de l’Unesco cont el codex ISO 639-3Lmo e a l’è parlada ind un area qe la includ tute i province de la Rejon Lombardia, el Trentin Ocidental, la totalitaa del territori aministrativ dei province Novara e VCO (Piemont), la totalitaa del canton Texin (Svizera) e i Vall Grixone del piovent meridional alpin in Svizera, ma anca un quai comun de la provinça de Lissandria e del Garda verones.
Vuna dei finalitaa de ‘Far Lombard, associazion per la lengua lombarda’ de la qual a foo part, a l’è propi quella de far saver ai jent qe l’Unesco, insema a tante oltre istituzion internazionai e su consili dei academeg esperts de defesa lenguistega, al difend el dirit de ognidun a parlar e sentir la lengua de la soa region anca ind i sits istituzionai e ind i mass media.
Ma la finalitaa plussee specifega de Far Lombard l’è quella de realizar e divulgar dei scriits de interess editorial e dei audio-video in lengua lombarda.
#Lombard Language Unesco Iso 639-3lmo
Publegad el 9 lui 2018 in ValtellinaNews
Rispondi, replica o rettifica